#تنظيف
الحمام دا من أسهل أماكن الترويق في البيت لانه كله بلبطه 😎
🌺 هنطلع كل حاجه في الحمام بس هنسيب الحوض والحيطان والقاعده 😂💃
🌺هنجيب اي حاجه نغسل بيها الحيطان
عندك ملح لمون اشطا باور بتاع الدهون فله اي حاجه عندك مش لازم حاجه معينه
طب لو مفيش اي حاجة من دول
شويه صابون سايل بتاع المواعين وحته سلكه وزي الفل جدا 🌸
🌺شباك الحمام نغسله كويس جدا
🌺مرايه الحمام عندك ملمع زجاج حلو جدا ونمسح بورق جرايد مفيش يبقي شزيه صابون وسلك وادعكي ورشي مايه نزلي الصابون وبعدين أمسحي بجرايد
🌺القاعده بتاعت الحمام من بره والحوض والبانيو لو عندك
في طرق كتير اعملي أسهل حاجه عندك
*ممكن تجيبي ملح ولمون وتدعكي بيهم الحاجات دي وتسيبيهم شويه ويعدين تغسلي بالسلك والصابون السايل
*وممكن شويه خل وترشيهم علي الاماكن دي وتسيبيهم برضو شويه وبعدين تدعكي بسلك ناعم علشان مايتجرحش
*او بيكنج صودا ومايه سخنه ورجيهم مع بعض كويس ورشي وتسيبيهم شويه وبعدين تغسلي
*ولو مش عندك كل ده شويه صابون سايل ونسيبه شويه وبعدين ندعك
🌺القاعده بتاعت الحمام من جوه
معلش دي هنتعب علشانها شوية
نعمل خلطه ونعينها عندنا بيكربونات وشويه صابون سايل بس يادوب يبقي زي الرمل كدا مش سايل ونخلطهم على بعض ونحطهم في مكعبات التلج لحد ما تجمد ونعينها في برطمان نحط منها في القاعده تفور اي وسخ فيها
🌺الركنه اللي في الحمام دي (مش عارفه اسمها) 😅 اللي في الحيطه
طبعا احنا طلعنا كل حاجه عليها بره الحمام
هنغسل الركنه دي كويس جدا لو بتتشال نشيلها ونغسل وراها كويس ونغسله ب مايه سخنه وننشفها كويس جدا جدا علشان المايه بتنشف وبتعمل بقع سمرا
نمسح كل حاجه بنحطها عليها الحاجات اللي مش بتستخدميها يوميا حطيها فوق خالص والحاجات الاستعمال اليومي او الاسبوعي حطيها تحت بس نرمي اي حاجه ملهاش لزمه 😒
🌺الحنفيات والدش
علشان نشيل الصدأ واللون الباهت بتاع الحنفيات هنجيب شويه ملح وليمون وندعك بيه الحنفيات لو ممكن تضيفي شويه خل علشان يدي لمعان ولو في أماكن ضيقه مش عارفه توصلي هاتي فرشه سنان قديمه وتحطيها في شويه مايه دافيه وخل وليمون وادعكس بس بعد ما تسيبي الخليط شويه عليها
الدش بعد فتره من الاستخدام بيبدأ تقفل عيون فيه نجيب كيس فيه خل ونربطه علي راس الدش ونسيبه لحد ما نخلص الحمام
🌺لو زي حالاتي حطه البلاستك بتاعك في الحمام هنغسله كويس جدا والبستله بتاعت المايه نغسلها ونحط مايه نضيفه فيها وننشفهم كويس
🌺تنضيف فرشه الحمام والحامل بتاعها
نشطف الفرشة والحامل بمايه سخنه
وبعدين ننقعهم في مايه مغليه وخل وكلور حطيهم في الشمس ينشفوا
🌺ستاره البانيو
لو قماش حطيها في الغساله
لو بلاستك أملي البانيو مايه سخنه وخل وبيكربونات وسيبها نص ساعة وافركيها براحه وتحطيها تنشق في الشمس بلاش تسيبيها متعلقه كتير علشان البكتريا
🌺كدا فاضل ارضيه الحمام
عندك ديتول او ملح ليمون او اي منظف عندك نحطه خمسه ع الارض وندعك كويس وأهم حاجه الحتت اللي عند الحيطه من تحت وتحت الحوض والقاعده والبانيو
الحتت اللي مش بنركز عليها دي وبتكون صفرا جدا
نرجع كل حاجه مكانها بعد ما نشفت 🌸
🌺السجاده اللي قدام الحمام اغسليها برضو بالمره قبل ما تدعكي الأرض ♥️
🌺
....
شويه نصايح عامه بقي علشان تسهل علينا التنضيف اليومي للحمام
💝في اي ازازه فاضيه عندك حطي شويه خل علي ديتول علي صابون مواعين ومايه
دخلتي عشان تتوضي
رشي منهم وبالفرشاة اللي بايدك ادعكي الحوض او لو القاعدة مش نضيفه خوديها بالمره
وعلقيهم تحت الحوض
وانتي واقفه علطول مش هياخد ثواتي
دايما حمامك فله ومفيش ريحه ابدااااااا
واي حد يجي فجأه مفيش ريحة ولمعان😍
💝أمسحي دايما الحمام وراكي بعد الدش وعودي العيله كلها على كدا
الحمام يفضل نضيف على طول وميبهدلش الأرض قدام الحمام
💝حاولي كل فتره تضيفي حاجه جديده للحمام او تغيري حاجه فيه شكل تعليق الفوط تحطي شمع بريحه حلوه تحطي ورده هيفرق في نفسيتك جدا
....
💙ياريت تكوني لابسه جوانتي علشان ايدك ما تتبهدلش
💙ماتخلطيش مواد كيماوية علي بعض علشان ممكن تتفاعل وتتعب صدرك
💙يكون في تهوية كويسه وانت بتروقي الحمام
💙البسي شبشب الحمام علشان ماتتزحلقيش
💙اغسلي الحمام من فوق لتحت علشان ما تبهدليش اي حاجه غسلتيها
شركة تنظيف بمكة
ردحذفنحن شركة تنظيف بمكة تساعدك في الحصول على مختلف خدمات التنظيف بأفضل صورة واقل سعر فقط عليك الاتصال على ارقامنا نحن الافضل في تقديم تنظيف منازل بمكة و تنظيف فلل بمكة و تنظيف سجاد بمكة
تنظيف سجاد بمكة
https://elbshayr.com/5/House-clearance